Жамбыл облысында жастардың білімін шыңдауға және интеллектуалдық деңгейін көтеруге бағытталған «AuylJasQuiz» атты зияткерлік ойын ұйымдастырылды. Аталған шара «Ауыл» партиясы жанындағы Жамбыл облыстық «Ауыл жастары» жастар қанатының бастамасымен өтті.

Интеллектуалды ойын 5 кезеңнен тұрады. Қазіргі таңда ойынның алғашқы кезеңі өз мәресіне жетіп, қатысушы жастар ұйымдастырушылар тарапынан арнайы марапаттарға ие болды. Бұл кезеңде қатысушылар өздерінің білім деңгейін, логикалық ойлау қабілеттерін және жылдам шешім қабылдау дағдыларын көрсете білді.

Жобаның негізгі мақсаты – жастардың таным көкжиегін кеңейту, оларды ізденімпаздыққа баулу және алынған ақпаратты қысқа уақыт ішінде сараптай алу қабілетін дамыту. Сонымен қатар, бұл бастама елімізде зияткер, білімді әрі белсенді жас буын қалыптастыруға өз үлесін қосуды көздейді.

Осындай форматтағы ойындар жастар арасында үлкен қызығушылық тудырып, олардың бос уақытын тиімді өткізуіне мүмкіндік береді. «AuylJasQuiz» жобасы алдағы кезеңдерде де жалғасын тауып, жаңа қатысушыларды тарту арқылы өз аясын кеңейтеді деп күтілуде.