«Еркін пікір» жастар қоғамдық бірлестігінің ұйымдастыруымен «Махаббат. Сағыныш» атты поэзиялық-сазды кеш жоғары деңгейде өтті. Кешке жиналған студенттер әсем әуен мен сырлы жырдың үйлесімін сезініп, ерекше рухани атмосфераға бөленді.

Шара барысында қатысушылар поэзия мен музыканы ұштастыра отырып, көрерменге әсерлі көңіл күй сыйлады. Жылы әрі еркін форматта өткен кеште студенттер өз шығармаларын оқып, танымал ақындардың өлеңдерін нақышына келтіре орындады. Сонымен қатар, сахнада шырқалған лирикалық әндер кештің мазмұнын байытып, әрбір тыңдарманның жүрегіне жол тапты. Көрермендер де белсенділік танытып, орындаушыларға қолдау білдіріп отырды.

Кештің басты ерекшелігі – оның шынайылығы мен сезімге толы атмосферасында болды. Махаббат пен сағыныш тақырыбындағы туындылар арқылы студенттер өз ойлары мен сезімдерін еркін жеткізе алды. Бұл өз кезегінде қатысушылар арасында рухани жақындық орнатып, достық қарым-қатынасты нығайтты. Осындай тағылымды шаралар студент жастардың шығармашылық әлеуетін арттырып қана қоймай, олардың мәдени-рухани дамуына оң әсерін тигізеді. «Махаббат. Сағыныш.» кеші – жүректерге жылу сыйлаған, есте қаларлық әдемі басқосулардың бірі болды.