«Ауыл» партиясы жанындағы Жамбыл облыстық «Ауыл жастары» жастар қанатының ұйымдастыруымен «AUYLJASQUIZ» интеллектуалды ойынының III кезеңі жоғары деңгейде ұйымдастырылып, өз мәресіне жетті. Жоба өңір жастарының интеллектуалдық әлеуетін арттыруға бағытталған маңызды бастамалардың бірі ретінде жалғасып келеді.

 Аталған кезеңге де өңірдің белсенді әрі білімді жастары қатысып, өзара тартысты бәсекеге түсті. Жалпы саны 12 команда бақ сынаған ойын барысында қатысушылар логикалық сұрақтарға жауап беріп, эрудиция мен жылдам ойлау қабілеттерін көрсетті. Әр кезең өз ерекшелігімен есте қалып, қатысушыларға жаңа тәжірибе мен серпін сыйлады.

 III кезеңнің қорытындысы бойынша:
 III орын – «Қадам» тобы,
 II орын – «КТК» тобы,
 I орын – «Тарихшылар» тобы иеленді.

Жеңімпаз командалар арнайы дипломдармен марапатталып, өздерінің жоғары дайындық деңгейін дәлелдеді.

 Сонымен қатар, жоба аясында барлық кезеңдердің нәтижелері ескеріліп, жеңімпаздарға ақшалай сертификаттар табысталды. Атап айтқанда, үш кезеңнің қорытындысы бойынша:
 III орын алған топтарға – 15 000 теңге,
 II орын алған топтарға – 20 000 теңге,
 I орын алған топтарға – 30 000 теңгелік сертификаттар берілді.

Бұл марапаттар жастардың білімге деген қызығушылығын арттырып, олардың алдағы уақытта да белсенді қатысуына ынталандырады.

 Ұйымдастырушылардың айтуынша, «AUYLJASQUIZ» жобасының басты мақсаты – ауыл жастары арасында зияткерлік ортаны қалыптастыру, олардың бос уақытын тиімді ұйымдастыру және білімді, ойлы ұрпақ тәрбиелеуге үлес қосу. Жоба аясында қатысушылар тек білімдерін сынап қана қоймай, командалық жұмыс, көшбасшылық және жылдам шешім қабылдау дағдыларын дамытады.

 Бүгінде «AUYLJASQUIZ» интеллектуалды ойыны жастар арасында үлкен қызығушылық тудырып, тұрақты түрде ұйымдастырылатын танымдық алаңға айналды. Алдағы уақытта жоба ауқымын кеңейтіп, қатысушылар қатарын арттыру жоспарланып отыр.

 Осындай мазмұнды шаралар жастардың жан-жақты дамуына жол ашып, олардың қоғамдағы белсенділігін арттыруға зор ықпал етеді.