Айша бибі атындағы дарынды қыз балаларға арналған мамандандырылған «БІЛІМ-ИННОВАЦИЯ» лицей-интернатында көрнекті мемлекет және қоғам қайраткері Дінмұхамед Ахметұлы Қонаевтың өмірі мен қызметіне арналған «Дәуір данасы» атты тағылымды кездесу ұйымдастырылды. Танымдық іс-шараның мақсаты – жас ұрпақты тарихи тұлғалардың өнегелі өмір жолымен таныстыру, олардың елге сіңірген еңбегін насихаттау және оқушылардың отансүйгіштік рухын қалыптастыру болды.

Кездесу барысында Дінмұхамед Қонаевтың еңбек жолы, мемлекет басқарудағы көрегендігі, ел экономикасы мен әлеуметтік саланың дамуына қосқан зор үлесі туралы жан-жақты мәліметтер айтылды. Қатысушылар қазақ халқының біртуар перзентінің басшылық қызметтегі ұстанымдары мен адамгершілік қасиеттері жайында мол мағлұмат алды.

Іс-шараға облыстық қоғамдық кеңестің мүшесі, республикалық «Ауыл» партиясы Жамбыл облыстық өңірлік филиалының төрағасы Сұлушаш Сатбекқызы Құрманбекова қатысып, оқушылармен еркін форматта әңгіме өрбітті. Ол өз сөзінде Дінмұхамед Қонаевтың қарапайымдылығы, халқына деген адалдығы, әділдігі мен ел игілігі жолындағы қажырлы еңбегі туралы әсерлі естеліктер мен тағылымды ойларын ортаға салды.

Сұлушаш Сатбекқызы Қонаевтың тұлғасы бүгінгі жастар үшін еңбекқорлықтың, жауапкершіліктің және отаншылдықтың жарқын үлгісі екенін атап өтті. Сондай-ақ, ол білім мен тәрбие қатар жүрген жерде ғана ел болашағының жарқын болатынын айтып, оқушыларды терең білім алуға, ұлттық құндылықтарды құрметтеуге және қоғам игілігі үшін қызмет етуге шақырды.

Кездесу аясында Сұлушаш Құрманбекова лицей-интернат кітапханасына Дінмұхамед Қонаевтың өмірі мен қоғамдық-саяси қызметіне арналған құнды кітапты сыйға тартты. Бұл сыйлық білім ордасының кітап қорын толықтырып қана қоймай, оқушылардың тарихи танымын кеңейтуге және көрнекті тұлғалардың өмір жолын тереңірек зерттеуіне мүмкіндік береді.

Шара барысында оқушылар өздерін қызықтырған сұрақтарын қойып, ел тарихы, көшбасшылық қасиеттер және қоғамға қызмет ету мәселелері төңірегінде пікір алмасты. Еркін сұхбат форматында өткен кездесу жастардың белсенділігін арттырып, олардың тарихи тұлғаларға деген қызығушылығын оятты.

Осындай тағылымы мол кездесулер жас ұрпақтың ұлттық тарихқа деген құрметін нығайтып, рухани құндылықтарды дәріптеуге ықпал етеді. Сонымен қатар, ел дамуына өлшеусіз үлес қосқан тұлғалардың өнегелі өмір жолын таныстыру арқылы жастардың бойында жауапкершілік, еңбекқорлық және патриоттық қасиеттер қалыптасады.

«Дәуір данасы» атты кездесу қатысушыларға ерекше әсер қалдырып, тарихи мұраны қастерлеудің және елге адал қызмет етудің маңызын терең түсінуге мүмкіндік берді.