Жамбыл облыстық пікірсайыс одағы «Еркін Пікір» жастар қоғамдық бірлестігі Тұрар Рысқұлов ауданы әкімдігі ішкі саясат бөлімінің «Отбасы институтын нығайту бойынша іс-шаралар ұйымдастыру» тақырыбындағы мемлекеттік әлеуметтік жобасын іске асыруда. Жоба аясында Тұрар Рысқұлов ауданындағы «Достық үйінде» «Бірлік барда-тірлік бар» тақырыбында отбасылық спартакидасы өткізілді. Бұл спартакиада ойыны отбасылардың атсалысуымен өтетін тәрбиелік маңызы зор ойын-сауықты бағдарлама.  Әр топ жеңіс мәресіне жету үшін бірнеше кезеңнен тұратын кедергілерге төтеп беруі тиіс болды. Отбасылық спартакиадаға «Жақсытаевтар», «Париева», «Саркуловы», «Асимбековтар» отбасы қатысып, тартысты ойын өрнегін көрсетті. Тәлімді тәрбие отбасынан бастау алса, дені сау ұрпақ – ұлт болашағы болмақ. Сондықтан, бала өмірінде салауатты өмір салтын қалыптастыруда, отбасылық институтты нығайту да бұндай іс-шаралардың маңызды орасан зор. 

Жамбыл облыстық пікірсайыс одағы «Еркін Пікір» жастар қоғамдық бірлестігі Тұрар Рысқұлов ауданы әкімдігі ішкі саясат бөлімінің «Аудан тұрғындары арасында этносаралық және конфессиялық келісімді нығайтуға және насихаттауға бағытталған іс-шаралар» тақырыбындағы әлеуметтік жобасын іске асыруда. Жоба аясында Тұрар Рысқұлов ауданындағы Достық үйінде «Біз бірге күштіміз»  атты жас этностар арасындағы спорттық жарыс өткізілді. Мақсат-Қазақстан халқының ынтымағы мен ұлтаралық татулығын одан әрі күшейту, этносаралық және конфессиялық келісімді, ұлтаралық татулықты нығайту, этносаралық қарым-қатынас пен қоғамдық келісімді реттеу болып табылады. Спорттық жарысқа 20-дан аса этнос жастары белсене атсалысып, тартысты ойын өрнегін көрсетті. Жастар Армреслинг стол, Тоғыз құмалақ, Дойбы ойнап өз бақтарын сынады. Жарыстың соңында жүлделі орын алған жастар марапатталып, сыйлықтар табысталды.

Жамбыл облыстық пікірсайыс одағы «Еркін пікір» жастар қоғамдық бірлестігі, Т. Рысқұлов ауданы әкімдігі ішкі саясат бөлімінің қолдауымен мемлекеттік әлеуметтік жобаны іске асыру мақсатында кезекті іс-шарасын Т. Рысқұлов ауданының полиция бөлімінде өткізді. Шараның негізгі мақсаты – пробация қызметінің есебінде тұрған азаматтарға психологиялық және құқықтық қолдау көрсету арқылы олардың әлеуметтік бейімделуіне ықпал ету, қайта қылмыстық жағдайларға тап болмауы үшін профилактикалық жұмыстар жүргізу. Психолог Марал Хантөреқызы қатысушыларға күнделікті өмірдегі психологиялық қиындықтармен күресу, күйзеліске қарсы тұру жолдары, агрессияны басқару және қоғамда өзін еркін сезінуге көмектесетін дағдылар туралы терең әрі түсінікті ақпарат берді. Сонымен қатар, ол отбасы құндылықтарының маңызы мен адамның ішкі тұрақтылығының қоғаммен үйлесімді өмір сүруіндегі рөліне ерекше тоқталды.

Марал Хантөреқызы пробация қызметіндің есебіндегі азаматтарға әлеуметтік ортаға қайта бейімделуінде психологиялық қолдаудың ерекше маңызды екенін айта келе, өзін-өзі бағалау, эмоцияны басқару, ашық коммуникация дағдыларына байланысты практикалық жаттығулар жасатты. Шара қатысушылардың өмірге деген көзқарасын жаңғыртуға және оң мотивация беруге бағытталған нәтижелі кездесу болды. Қатысушылар спикердің кеңестерін пайдалы деп бағалап, алдағы уақытта осындай шаралардың жиі өтуіне қызығушылық танытты.

Жамбыл облыстық пікірсайыс одағы «Еркін пікір» жастар қоғамдық бірлестігі “Отбасы институтын нығайту бойынша іс-шаралар ұйымдастыру” тақырыбындағы мемлекеттік әлеуметтік жобаны іске асыруда. Бұл жобаның негізгі мақсаты – отбасылық құндылықтарды нығайту, ата-ана мен бала арасындағы қарым-қатынасты жетілдіру және тұрмыстық зорлық-зомбылықтың алдын алу. Жоба аясында аудандағы мектептердің директорларының тәрбие ісі жөніндегі орынбасарлары, мектеп және түрлі мекемелердің психологтары мен жауапты мамандарының қатысуымен семинар-тренинг ұйымдастырылды. Іс-шара отбасы институтын дамыту және оқушылардың арасында туындайтын психоәлеуметтік мәселелерді шешуге арналған тиімді тәсілдерге арналды. Семинарда педагог-психолог Рахимова Г. “Оқушылардың арасындағы аутодеструктивті мінез-құлықтың алдын-алу мәселелері және оны шешу жолдары” тақырыбында мазмұнды баяндама жасады. Ол суицидтік ойлар мен мінез-құлықтың алдын алу, ерте белгілерін анықтау, психологиялық қолдау көрсету жолдарын нақты мысалдармен түсіндіріп берді. Іс-шара барысында қатысушылармен “Кім лидер?” тренингі өткізілді. Бұл тренинг мектеп оқушыларының көшбасшылық қабілеттерін анықтауға және дамытуға бағытталған. Сонымен қатар, психологтар оқушылармен жұмыс жасауға арналған тиімді техникалармен бөлісті. Олардың қатарында – “жіп” терапиясы, «Кез келген қиын жағдайдың шығатын жолы бар» атты мотивациялық терапия, коллаж әдісі, “психолог портреті” жаттығуы және ата-аналармен жүргізілетін жұмыс түрлері қамтылды. Тренинг барысында қатысушылар топтық жұмыс арқылы тәжірибе алмасып, түрлі әдістерді тәжірибеде қолдану мүмкіндігіне ие болды. Мұндай практикалық жаттығулар психологтар мен педагогтердің кәсіби дағдыларын нығайтып, мектеп оқушыларына көрсетілетін психологиялық көмектің сапасын арттыруға септігін тигізеді. Іс-шара соңында қатысушыларға әдістемелік материалдар таратылып, алғыс хаттар мен естелік сыйлықтар табысталды. Қатысушылар осындай мазмұнды әрі тәжірибеге бағытталған семинарлардың алдағы уақытта да жалғасын табуына ниет білдірді.

Жамбыл облыстық пікірсайыс одағы «Еркін пікір» жастар қоғамдық бірлестігі «Мемлекеттік тапсырыс шеңберінде пробация қызметінің есебіндегі азаматтарға әлеуметтік-құқықтық көмек көрсету және түсіндірме жұмыстарын жүргізу» тақырыбындағы мемлекеттік әлеуметтік жобаны жүзеге асыруда. Жобаның негізгі мақсаты – пробация қызметінде есепте тұрған азаматтарды қоғамға тиімді түрде қайта бейімдеу.

Жоба аясында пробация қызметінің есебіндегі азаматтар мен азаматшалар арасында спорттық іс-шара ұйымдастырылды. Бұл іс-шара тек қана салауатты өмір салтын насихаттауға ғана емес, сонымен қатар, қатысушылар арасында өзара байланыс пен сенімділік орнатуға, оларды қоғамдық өмірге тартуға бағытталды. Іс-шара барысында қатысушылар түрлі спорттық ойындарға белсене қатысты. Командалық жарыстар мен эстафеталар ұйымдастырылып, қатысушылардың белсенділігі мен ынтасы жоғары деңгейде болды. Мұндай форматтағы кездесулердің маңызы зор, себебі олар азаматтардың бойындағы сенімділікті арттырып, қоғамға кері оралудың оңтайлы жолдарын көрсете алады.

Шара соңында жеңімпаз командалар мен белсенді қатысушылар алғыс хаттармен және естелік сыйлықтармен марапатталды. Қатысушылар өз ризашылықтарын білдіріп, мұндай шаралардың жиі өткізіліп тұруын қолдайтындарын жеткізді.

Жамбыл облыстық пікірсайыс одағы «Еркін пікір» жастар қоғамдық бірлестігі Т. Рысқұлов ауданы әкімдігінің ішкі саясат бөлімінің «Аудан тұрғындары арасында этносаралық және конфессияаралық келісімді нығайтуға және насихаттауға бағытталған кездесулер, семинарлар, іс-шаралар ұйымдастыру» атты мемлекеттік әлеуметтік жобаны жүзеге асыруда. Аталған жоба аясында Луговой ауылындағы М. Горький атындағы орта мектепте маңызды кездесу өтті. Іс-шараның басты мақсаты – жастар арасында этносаралық келісім мен өзара сыйластық құндылықтарын насихаттау. Кездесудің арнайы қонағы – Тараз қалалық мәслихатының депутаты Азамат Лесбек болды. Ол өз сөзінде Қазақстанда түрлі этностардың бейбіт және татулықта өмір сүруі – еліміздің басты байлығы екенін атап өтті. Сонымен қатар, этносаралық келісімді сақтау әр азаматтың азаматтық парызы екендігін жеткізіп, толеранттылық пен өзара құрметтің қоғам дамуына оң ықпал ететінін ерекше атап өтті.

Кездесуге қатысқан оқушылар мен ұстаздар тарапынан белсенділік байқалды. Қатысушылар этносаралық қарым-қатынастардың құқықтық негіздеріне қатысты сұрақтар қойып, депутаттан нақты әрі пайдалы мәліметтер алды. Осындай кездесулер жастардың құқықтық мәдениетін арттырып, қоғамдық келісім мен бірлікті нығайтуға өз үлесін қосары сөзсіз.

Жамбыл облыстық пікірсайыс одағы «Еркін пікір» жастар қоғамдық бірлестігі Т. Рысқұлов ауданы әкімдігі ішкі саясат бөлімінің мемлекеттік әлеуметтік жобасы аясында «Отбасы институтын нығайту бойынша іс-шаралар ұйымдастыру» тақырыбында ақпараттық-түсіндіру жұмыстарын жүргізуді жалғастыруда. Аталған жоба шеңберіндегі кездесу Луговой ауылындағы М. Горький атындағы орта мектебінде өткізілді. Іс-шараға мектептің жоғары сынып оқушылары мен мұғалімдер қатысты. Кездесудің негізгі мақсаты — жасөспірімдердің құқықтық сауаттылығын арттыру, отбасы құндылықтарының мәнін терең түсіндіру, отбасындағы қарым-қатынастарды заң аясында реттеудің маңыздылығын насихаттау. Жамбыл облыстық нотариаттық палатасының атқарушы директоры, заңгер Өмірбеков Данияр «Құқықтық мәдениет және отбасылық жауапкершілік» тақырыбында мазмұнды дәріс оқыды. Ол өз сөзінде отбасы ішіндегі құқықтар мен міндеттер, ата-аналар мен балалар арасындағы өзара сыйластық, құқықтық даулардың алдын алу, отбасылық қатынастарды реттеудегі заң нормаларына кеңінен тоқталды.

Кездесу барысында оқушылар өздерін қызықтырған құқықтық сипаттағы сұрақтарын қойып, нақты әрі кәсіби жауаптар алды. Сонымен қатар, спикер құқықтық сауаттылықты арттырудың маңызын түсіндіріп, отбасындағы дау-дамайлардың алдын алу жолдарын мысалдар арқылы түсіндірді. Шара соңында қатысушылар арасында шағын пікірталас ұйымдастырылып, отбасы, тәрбие және құқық тақырыптары төңірегінде өз ой-пікірлерімен бөлісті. Мұндай формат қатысушылардың белсенділігін арттырып, өз көзқарастарын еркін білдіруге мүмкіндік берді.

Жамбыл облыстық пікірсайыс одағы «Еркін пікір» жастар қоғамдық бірлестігі мен Т. Рысқұлов ауданы әкімдігі ішкі саясат бөлімінің ұйымдастыруымен «Жастар арасында қазақстандық патриотизмді насихаттау, ұлттық құндылықтарды сақтау және жасөспірімдер мен жастар арасында құқық бұзушылық пен қылмыстың алдын алу» жобасы аясында Құлан колледжінде мазмұнды кездесу өтті.

Кездесуде – Тараз қалалық мәслихатының депутаты Азамат Лесбек жастармен еркін сұхбат жүргізіп, олардың қоғамдағы рөлі, Отан алдындағы жауапкершілігі, және құқықтық сауаттылығы туралы нақты ойларымен бөлісті.

Ол ұлттық құндылықтардың жастар өміріндегі маңызын ерекше атап өтіп, бүгінде олардың әлсіреуінен көптеген әлеуметтік проблемалардың туындап жатқанын жеткізді. Сонымен қатар, жастарды білімге, еңбекқорлыққа, мәдениеттілікке шақырды.

Іс-шара студенттердің санасында патриоттық рух пен ұлттық сана-сезімді қалыптастыруға, олардың бойында тәртіп пен заңға құрметті күшейтуге зор ықпал етті.

Жамбыл облыстық пікірсайыс одағы «Еркін пікір» жастар қоғамдық бірлестігі Т. Рысқұлов ауданы әкімдігі ішкі саясат бөлімінің «Нашақорлық пен есірткі бизнесіне қарсы іс шаралар ұйымдастыру» тақырыбындағы мемлекеттік әлеуметтік жобасын жүзеге асыруда. Жоба аясында Т.Рысқұлов ауданы, Құлан ауылы, Ә.Бөкейханов атындағы орта мектебінде нашақорлықтың алдын алу мақсатында ақпараттық кездесу өтті. Тараз қалалық маслихатының депутаты Лесбек Азамат өз сөзінде жастар тәрбиесінде отбасының, білімнің және дұрыс орта таңдаудың маңыздылығына тоқталып, есірткінің адам өміріне әкелетін зиянды салдарын нақты мысалдармен түсіндіріп өтті. Ол нашақорлықтың тек жеке адамға ғана емес, бүкіл қоғамға кері әсер ететінін, бұл дерттің алдын алу үшін әрбір жас өзін-өзі тәрбиелеуге, дұрыс таңдау жасауға ұмтылуы қажет екенін ерекше атап өтті. Сондай-ақ, елімізде жастарға жасалып отырған мүмкіндіктер жайлы айтып, пайдалы істерге бағытталған жастардың белсенділігі қоғамның болашағына тікелей ықпал ететінін жеткізді.

Кездесуде депутат жастармен ашық сұхбат құрып, құқықтық сауаттылық, салауатты өмір салты, және қоғамдағы белсенділіктің маңыздылығы туралы ой бөлісті.  Есірткінің заң тұрғысынан жауапкершілігі, оның ауыр салдары мен қылмыстық жаза түрлері туралы түсіндірме жұмыстарын жүргізді.

Оқушылар өздерін қызықтырған тақырыптар төңірегінде сұрақтар қойып, тұшымды жауаптар алды. Бұл іс-шара жасөспірімдерге өз болашағына байыппен қарау қажеттігін түсіндіріп, азаматтық жауапкершілікті арттыруға бағытталды.